Ruta en familia

Boiro dispón dun amplo abanico de plans, recunchos e recursos que percorrer, gozar e descubrir cos máis pequenos da casa. Unha vila cunha gran oferta de ocio, unha vila tranquila e  un destino ideal para o turismo familiar.

Plans nos que os rapaces poderán divertirse ao aire libre nos espazos naturais do noso municipio,  coñecer a nosa historia a través das pegadas dos nosos devanceiros visitando os recursos arqueolóxicos, viaxar ao tempo das moendas visitando un muíño, achegarse a os oficios tradicionais de temática mariñeira facendo algunha das visitas do programa “Paséate con Nós”, poñerse morenos e darse un baño refrescante nas plácidas augas das nosas praias ou pasalo en grande nos eventos e actividades culturais que cada semana se organizan en Boiro. Sen dúbida momentos e experiencias en familia que merecen ter un oco no álbum de fotos familiar.

En Boiro, atoparedes unha ampla gama de establecementos onde aloxarvos, dende aloxamentos rurais a hoteis con encanto, pensións familiares, un cámping e unha gran variedade de vivendas turísticas, dirixida a satisfacer a demanda de familias que queiran somerxerse de cheo na vida dos boirenses e as súas costumes. Consulta Onde durmir

Ademais, teredes a posibilidade de degustar comida caseira ou gozar dos mellores produtos da Ría nos seus establecementos, do mar á mesa, á vez que descubrides unha pequena gran localidade chea de vida. Consulta Onde comer

A seguinte proposta fará da vosa visita a Boiro un recordo inesquecible:

Como toma de contacto propoñémosvos visitar o centro urbano de Boiro. Está cheo de autenticidade e beleza. Podedes iniciar o día cun agradable paseo pola rúa peonil boirense, onde se aglutina gran parte da vida do da vila. Alí atoparedes o Mercado Municipal, onde se vende o mellor produto do municipio. Perdédevos polas rúas máis céntricas da localidade e percorrede o Paseo Fluvial do Río Breiro, unha senda peonil, de case 1 km de lonxitude, que une o centro urbano co paseo marítimo de Barraña seguindo o curso do río.

O paseo marítimo de Barraña  é como unha ventá á Ría de Arousa. Se tedes sorte, pode que teñades a oportunidade de ver ás mariscadoras recollendo marisco criado no areal de Barraña. Agora, se continuades polo paseo marítimo de Barraña chegaredes a Área Recreativa do Espazo Natural do Esteiro do Río Coroño. Onde os rapaces poderán pasalo en grande no parque multiaventura a través dos seus circuítos, tirolinas e rocódromo.

Moi preto, na Avenida de Compostela está o acceso ao Paseo Fluvial dos Muíños de Ponte Goiáns, no que se xuntan natureza e tradición. Descobre o paisaxe fluvial e viaxa no tempo visitando os Muíños de Ponte Goiáns.

Si se vos abriu o apetito, no núcleo urbano dispoñedes dunha ampla oferta de restaurantes, parrilladas, bares de tapas, pulperías e pizzerías onde repoñer forzas e poder degustar os mellores produtos da zona.

Tras recuperar forzas, propoñemos diferentes opcións para sacarlle o máximo partido ao día:

• Pasade a tarde de forma relaxada gozando da tranquilidade, das agradables temperaturas e das comodidades dos areais do noso municipio.
• Realizar algunhas das seguintes visitas guiadas:

Programa Paséate con Nós. Non hai mellor maneira de transferir a sabedoría e o coñecemento ós máis novos que a través dos nosos maiores. Descubride os oficios tradicionais da man de persoas xubiladas do noso pobo que vos achegarán ás temáticas de: nasas, mexillón, marisqueo, carpintería de ribeira e muíños de río.

Ruta do Mexillón. Percorrede nun paseo en barco a Ría de Arousa, un dos espazos máis entrañables desta localidade. Coñecede o ouro negro do mar de Boiro, o mexillón, seguindo a súa senda dende o mar ata o prato.

Centro Arqueolóxico do Barbanza e Castros de Neixón. Onde poderedes seguir as pegadas dos nosos devanceiros e coñecer o gran patrimonio arqueolóxico que se atopa na comarca do Barbanza. Unha visita sobre dólmenes, petróglifos e castros que vos transportará no tempo.

Exposición Etnográfica Mariñeira “Mar de Boiro”. As temáticas que se atopan nos espazos expositivos desta mostra son: Marisqueo de bivalvos, marisqueo de crustáceos e cefalópodos (lagosta, nécora, polbo, centola), pesca de baixura, mexillón. Tamén atopararedes antigas artes de pesca empregadas tradicionalmente polos pescadores.

A Casa das Camelias. Un xardín botánico cunha gran variedade de plantas procedentes de todo o mundo onde os máis pequenos pasarano en grande percorrendo o seu labirinto de camelias, alimentando aos peixes do estanque, visitando un muiño e un hórreo e coñecendo especies vexetais moi curiosas ao longo da visita.

• Para os máis aventureiros, ofrecémosvos outras posibilidades, onde queimar a vosa adrenalina mentres gozades dunha contorna privilexiada: paseos en piragua, canoa, kayak, funtubes... son algunhas das posibilidades de actividades náuticas que se poden practicar en Boiro. Consulta "Turismo Náutico" e “Turismo Deportivo”.

Din que a felicidade é unha viaxe, non un destino, pero por que non ser ambas? Ao longo da costa boirense atoparedes a vila mariñeira de Cabo de Cruz; a última parada das nosas propostas e onde quedaredes prendidos da beleza da estampa do pobo e a Ría de Arousa coa posta de sol. Trátase dun dos pobos costeiros máis fermosos de toda a comarca, onde a súa fama pola calidade dos seus mariscos, sobre todo o mexillón, excede fronteiras nacionais. As súas casiñas de cores, a súa luz, o seu porto e a súa lonxa, convérteno en visita obrigatoria.

Gozade dun paseo familiar polo seu porto, onde paga a pena parar, gozar das fermosas panorámicas que ofrece da ría e repoñede forzas nas terrazas dalgún dos seus bares.

Antes de finalizar a xornada, aconsellámosvos que aproveitedes a escura noite, para coñecer a vida nocturna do pobo. Para tapear, tomar unhas copas e fotografar o Boiro nocturno.

Contaredes cunhas estampas únicas para compartir en familia e inmortalizar para sempre momentos únicos vividos no noso pobo.