Ruta de 1 día

Mañá

Ao chegar a Boiro, o primeiro  que debes facer é percorrer as rúas e as prazas do centro urbano. Na oficina de Turismo, sita na Praza de Galicia s/n,  proporcionámosche un bo mapa – rueiro de Boiro para que poidas perderte entre as principais rúas da localidade.

Dende aquí xa poderás comezar a túa ruta. A Oficina de Turismo atópase na casa consistorial, no mesmo casco urbano do municipio. Arredor desta encontramos varios dos principais atractivos que che  invitamos a descubrir, como é o caso da Igrexa Parroquial de Santa Baia de Boiro, un claro exemplo da arte barroca rural, cuxa orixe remóntase a un antigo templo construído a comezos do século XVII. Este templo parroquial coñeceu no século XVIII as obras de ampliación de maior envergadura. As súas  orixes barrocas maniféstanse en motivos estilísticos, resaltando o campanario, inspirado na Torre do Reloxo da Catedral Compostelá. A igrexa está enriquecida coa obra escultórica de mestres como Miguel de Romay, unha das primeiras figuras da escultura barroca galega, e de artesáns e artistas locais como os Núñez da Tenencia, autores de numerosas obras escultóricas por toda a comarca.

Xa de volta da zona centro, despois do obrigado shopping, suxerímoste que te achegues ao Paseo Fluvial do Río Breiro, unha nova senda peonil, de case 1 km de lonxitude, que une o casco urbano có paseo marítimo de Barraña e na que poderás gozar dun ambiente tranquilo, rodeado de numerosa vexetación, así como dun peculiar lago. Ao longo do seu percorrido atoparás tamén unha variedade de máis de 200 árbores de ribeira, ata seis tipos de plantas -algunhas acuáticas- e unha gran pradería de herbáceos. Conta cunha área recreativa dotada de mesas e bancos en zona de sombra, nos que poder deterte  para retomar forzas.

Se sempre che gustou o mar, ou  che  enche de curiosidade a actividade e vida das mariscadoras, nas praias urbanas do municipio, as de Barraña e Barraña – Saltiño, poderás vivilo dun xeito próximo. Nestas praias de ría ,sempre que a baixamar o permita, poderás contemplar da man destas mulleres como se extrae a ameixa, o berberecho ou o longueirón. Ademais, un paseo marítimo de 3 km de lonxitude percorre estes dous areais, onde encontrarás unha interesante infraestrutura deportiva e de ocio: parque biosaudable, carril bici, campos de fútbol e voleibol – praia, área de adestramento, parques infantís e varios puntos accesibles.

O mar e a serra descobren tamén na paisaxe boirense lugares de gran beleza e riqueza natural que  che axudamos a descubrir. Na desembocadura do principal río de Boiro, atópase unha das paraxes naturais máis fermosas e peculiares da zona, o Espazo Natural do Esteiro do Río Coroño: unha área  habilitada con 50m² de piñeiral con mesas e grellas, niño de libros, un parque multiaventuras, training box, circuíto saudable e 1480m de pista de running; un lugar ideal para o adestramento e de  gran beleza paisaxística.

Convidámoste tamén a percorrer o Paseo fluvial dos Muíños da Ponte Goiáns.  A contorna destes muíños ten moitas posibilidades, xa que conta cunha área recreativa con mesas e sombra e ofrece, ademais, a posibilidade de coñecer a flora e fauna típica do río. Se contactas coa oficina de turismo tes tamén a posibilidade de ver moer un muíño de río, o muíño de Arriba, de Xaime ou de Casais e visitar o muíño de Abaixo ou do Agro. Os muíños atópanse musealizados, con paneis explicativos e con aparellos que se utilizaban nas antigas moendas.

Xantar

O tapeo na nosa localidade é moito máis que tradición, forma parte da nosa cultura. Basta con que percorras a rúa peonil en horas punta para que poidas comprobalo. Bares e terrazas son lugar de encontro nos que conversar  cós amigos gozando dun bo viño. Aínda que a rúa peonil é a principal zona de tapeo e comida, hai outros moitos bares e restaurantes dispersos no rueiro de Boiro.

O mexillón, a ameixa, o berberecho, o polbo, a pescada e o sargo da ría fan de cada degustación unha experiencia única.

Tarde

A primeira hora da tarde recomendamos a visita á zona arqueolóxica dos Castros de Neixón, declarados Ben de Interese Cultural (BIC) no ano 2011 e ao Centro Arqueolóxico  do Barbanza, que alberga e custodia no seu interior unha parte importante dos restos recuperados nas escavacións arqueolóxicas. O Centro Arqueolóxico foi a primeira colección visitable de natureza arqueolóxica e ámbito local que se creou en Galicia. Nel, a través de maquetas, paneis e reproducións explícase o contexto dos restos arqueolóxicos máis representativos de toda a comarca do Barbanza: dende o Neolítico ata a Idade de Ferro: túmulos e mámoas, arte rupestre e castros.

No centro de interpretación, que está adaptado para persoas con discapacidade visual e que dispón dunha sala inferior practicable para persoas con mobilidade reducida, permanece aberto de xoves a domingo, mañá e tarde.

O paseo marítimo de Carragueiros e A Retorta amosaranche a beleza destes dous areais. A través del poderás gozar dunha marabilla natural, o Complexo Húmido e Sistema Dunar de Carragueiros, e viaxar no tempo ata as orixes mariñeiras da vila de Cabo de Cruz, grazas á Senda Litoral de Boiro.

Así, a vila pesqueira, a lonxa e o porto de Cabo de Cruz son outros dos lugares máis emblemáticos da nosa localidade. Esta pequena vila mariñeira garda gran parte da historia de Boiro. No seu porto descubrirás que o pasado e o presente conviven ao igual que conviven o boiante porto pesqueiro có peirao vello, que é un dos máis antigos da ría, e no que teñen amarrado e buscado abrigo embarcacións que repasan a historia mariñeira de Galicia, como son as lanchas xeiteiras, as dornas de tope, os balandros, os galeóns, as traíñas ou as gamelas, entre outras. O cultivo do mexillón nesta zona foi quizás a orixe desta vila. Na súa lonxa, os mariscadores, mariñeiros, distribuidores e donos de peixerías xúntanse para facerse có mellor marisco da xornada.

Para rematar o día, e se tes a cámara de fotos a man, non podes perderte as casas de cores do Paseo marítimo da praia de Ribeira Grande. Son así de pintorescas porque os pescadores aproveitaban os botes de pintura que lles sobraban tras pintar os seus barcos para encher de cor os seus fogares. É quizais a forma máis gráfica de expresar a fusión entre a vida mariñeira e a de terra firme.

Cea

A experiencia dos restauradores fai que cada un aporte aos seus pratos o seu propio toque persoal, conseguindo así delicatesen únicas.

Un bo número deles ofrecen unha ampla gama de produtos nas súas cartas a unha boa relación calidade – prezo, na que o prato estrela é o mexillón (produto con denominación de Orixe Protexida, Mexillón de Galicia). Non podes marcharte de Boiro sen probalo. Poucos alimentos pódense considerar tan sans, tan saborosos e tan completos como o noso mexillón. Parada obrigada en calquera dos nosos bares ou restaurantes.

Se queres ter unha experiencia gastronómica con garantía e produtos de proximidade, reservar nun dos nosos restaurantes converterase para ti nunha experiencia gastronómica inesquecible. Consulta "Onde comer" no directorio de recursos.

Noite

Se estás en Boiro, poderás gozar dun bo ambiente e do barullo nocturno.  A zona de movida más coñecida atópase en Pablo Iglesias (rúa peonil), Praza da Mancomunidade e rúa Principal, con ambientes musicais diferentes, nos que poderás gozar dunha copa cós teus amigos. Destacamos “A Pousada da Galiza Imaxinaria”, en Pablo Iglesias, local de copas, que ofrece música en directo durante todo o ano.