Ruta de 2 días

Día 1. Mañá

Si só vas estar unha  fin de semana en Boiro propoñémosche esta escapada coa que poderás coñecer os nosos mellores recunchos.

Ao chegar a Boiro, o primeiro  que debes facer é percorrer as rúas e as prazas do centro urbano. Na oficina de Turismo, sita na Praza de Galicia s/n,  proporcionámosche un bo mapa – rueiro de Boiro para que poidas perderte entre as principais rúas da localidade.

A Oficina de Turismo atópase na praza de Galicia, na casa consistorial, no mesmo casco urbano do municipio, onde xa poderás comezar a túa ruta. Arredor desta encontramos varios dos principais atractivos que  che invitamos a descubrir, como é o caso da Igrexa Parroquial de Santa Baia de Boiro, un claro exemplo da arte barroca rural, cuxa orixe remóntase a un antigo templo construído a comezos do século XVII. Este templo parroquial coñeceu no século XVIII as obras de ampliación de maior envergadura. As  súas  orixes barrocas maniféstanse en motivos estilísticos, resaltando o campanario, inspirado na Torre do Reloxo da Catedral Compostelá. A igrexa está enriquecida coa obra escultórica de mestres como Miguel de Romay, unha das primeiras figuras da escultura barroca galega, e de artesáns e artistas locais como os Núñez da Tenencia, autores de numerosas obras escultóricas por toda a comarca.

Esta igrexa aséntase a carón do Camiño Real, ou como se coñece popularmente, Camiño Vello. Estes eran camiños de tipo sacramental e comercial que unían Santiago de Compostela coas demais localidades. Na beira, asentábanse a poboación formando diferentes vilas que aínda hoxe conservan as mesmas características: rúas estreitas, casas altas con balcón e grandes portais.

Tamén nunha destas rúas, a peonil, atópase o Mercado Municipal de Abastos, unha oportunidade única para que coñezas as tradicións máis arraigadas da nosa localidade; os nosos oficios e costumes. Un espazo que, de luns a sábado, abre as súas portas facendo gala da riqueza da nosa terra e o noso mar e brindándoche  a oportunidade de mesturarte coa nosa xente. Mergúllate na nosa idiosincrasia local achegándote a este  espazo variado e único  de comercio, onde poderás mercar o peixe máis fresco da ría, as mellores carnes ou as estupendas froitas, verduras e hortalizas cultivadas nas hortas do noso municipio.

Exceptuando os domingos, abre tódolos días pola mañá desde as 8.00 ata as 14.00 horas e de luns a venres polas tardes de 18.00 a 21.00

Unha vez abandones o casco urbano, podes elixir entre dúas alternativas. A primeira dirixirte cara á desembocadura do principal río de Boiro, onde se atopa un dos paraxes naturais máis fermosos e peculiares da zona, o Espazo Natural do Esteiro do Río Coroño: unha área  habilitada con 50m² de piñeiral con mesas e grellas, niño de libros, un parque multiaventuras, training box, circuíto saudable e 1480m de pista de running; un lugar ideal para o adestramento e de  gran beleza paisaxística.

Convidámosche tamén a percorrer o Paseo fluvial dos Muíños de Ponte Goiáns.  A contorna destes muíños ten moitas posibilidades, xa que conta cunha  área recreativa con mesas e sombra e ofrece, ademais, a posibilidade de coñecer a flora e fauna típica do río. Se contactas coa oficina de turismo tes tamén a posibilidade de ver moer un muíño de río, o muíño de Arriba, de Xaime ou de Casais e visitar o muíño de Abaixo ou do Agro. Os muíños atópanse coma museos , con paneis explicativos e con aparellos que se utilizaban nas antigas moendas.

A segunda opción é dirixirte cara a costa. Se sempre che gustou  o mar, ou che  enche  de curiosidade a actividade e vida das mariscadoras, nas praias urbanas do municipio, as de Barraña e Barraña – Saltiño, poderás vivilo dun xeito próximo. Nestas praias de ría, sempre que a baixamar o permita, poderás contemplar da man destas mulleres como se extrae a ameixa, o berberecho ou o longueirón. Ademais, un paseo marítimo de 3 km de lonxitude percorre estes dous areais, onde encontrarás unha interesante infraestrutura deportiva e de ocio: parque biosaudable, carril bici, campos de fútbol e voleibol – praia, área de adestramento, parques infantís e varios puntos accesibles.

Día 1. Xantar

 Unha vez no paseo marítimo, poderás degustar, en calquera dos restaurantes que atoparás ao teu paso unha gran variedade de peixes e mariscos da nosa ría.

O mexillón, a ameixa, o berberecho, o polbo, a pescada e o sargo da ría fan de cada degustación unha experiencia única.

Consulta aquí onde comer.

Día 1. Tarde

A primeira hora da tarde recoméndase visitar “A Casa das Camelias”, unha parcela de uns 12.000m² de superficie, cunha casa anterior a 1.785, muíño de río, hórreo e cruceiro; e na que a súa dona rega, poda e mima a máis de 1.500 variedades de plantas. ¡Non hai ningunha que se lle resista! Conta, de feito, con plantas dos 5 continentes do mundo, aínda que a súa especialidade, a raíña do seu xardín, é a camelia, a flor de Galicia. Nesta  parcela  poderás apreciar máis de 1.000 variedades, 500 delas diferentes.

O paseo marítimo de Carragueiros e A Retorta amosarache a beleza destes dous areais. A través del poderás gozar dunha marabilla natural, o Complexo Húmido e Sistema Dunar de Carragueiros, e viaxar no tempo ata as orixes mariñeiras da vila de Cabo de Cruz, grazas á Senda Litoral de Boiro.

Así, a vila pesqueira, a lonxa e o porto de Cabo de Cruz son outros dos lugares máis emblemáticos da nosa localidade. Esta pequena vila mariñeira garda gran parte da historia de Boiro. No seu porto descubrirás que o pasado e o presente conviven ao igual que conviven o boiante porto pesqueiro có peirao vello, que é un dos máis antigos da ría, e no que teñen amarrado e buscado abrigo embarcacións que repasan a historia mariñeira de Galicia, como son as lanchas xeiteiras, as dornas de tope, os balandros, os galeóns, as traíñas ou as gamelas, entre outras. O cultivo do mexillón nesta zona foi quizá a orixe desta vila. Na súa lonxa, os mariscadores, mariñeiros, distribuidores e donos de peixerías xúntanse para facerse có mellor marisco da xornada.

Cerca do porto, consérvanse os restos do Castro de Achadizo, que os expertos consideran como a primeira aldea permanente da zona. Dada a súa proximidade có peirao pesqueiro, crése que estes antigos poboadores xa aproveitaban a marea baixa para fornecerse do ouro laranxa da ría de Arousa: o mexillón. Se tes a cámara de fotos a man, non podes perderte as casas de cores do Paseo marítimo da praia de Ribeira Grande. Son así de pintorescas porque os pescadores aproveitaban os botes de pintura que lles sobraban tras pintar os seus barcos para encher de cor os seus fogares. É quizais a forma máis gráfica de expresar a fusión entre a vida mariñeira e a de terra firme.

Día 1. Cea

Despois de gozar dun día produtivo por Boiro, recomendámosche ir cear a un dos nosos restaurantes.

Un bo número deles ofrecen unha ampla gama de produtos nas súas cartas a unha boa relación calidade – prezo, na que o prato estrela é o mexillón (produto con denominación de Orixe Protexida, Mexillón de Galicia). Non podes marcharte de Boiro sen probalo. Poucos alimentos pódense considerar tan sans, tan saborosos e tan completos como o noso mexillón. Parada obrigada en calquera dos nosos bares ou restaurantes.

Se queres ter unha experiencia gastronómica con garantía e produtos de proximidade, reservar nun dos nosos restaurantes converterase para ti en unha experiencia gastronómica inesquecible. Consulta "Onde comer" no directorio de recursos.

Día 1. Noite

Non experimentar a noite boirense é impensable. As súas rúas están cheas de terrazas, restaurantes, bares, pubs, que abren ata a madrugada. Lugares onde poderás tomar un viño e compartir charlas relaxadas entre os amigos, establecementos con actividades ao vivo que seguro farán  a túa estancia máis animada e divertida, ou incluso, poderás achegarte a  locais máis modernos, con ambientes musicais diversos para todas as idades e gustos.

Día 2. Mañá

Durante esta segunda xornada, unha boa opción para coñecer Boiro de forma relaxada e distendida é un paseo en barco pola Ría de Arousa, para contemplar a costa desde outra perspectiva. Desde algúns puntos como o Club Náutico Boiro – Mariña Cabo de Cruz  e o Club Náutico Deportivo de Barraña (en Escarabote), organízanse rutas para grupos que queren coñecer tanto a Ría como o proceso do cultivo do mexillón.

No teu paseo pola Ría poderás descubrir a importancia dos nosos portos náuticos, que son todo un referente dentro do turismo náutico na Ría de Arousa e tamén a beleza das nosas calas e areais. Terás tamén a oportunidade de gozar das nosas vilas  desde o mar, contemplarás en vivo o duro traballo dos mariñeiros e mariscadores observando como se utilizan os diferentes aparellos e artes de pesca para a captura de peixes e mariscos.

Se o que te interesa é a ruta do mexillón, gozarás dun ameno paseo pola ría mentres coñeces de primeira man e de forma persoal a historia e cultivo deste molusco. Visitarás zonas mexilloeiras onde poderás ver os traballos dos profesionais in situ, ademais coñecerás como o ciclo de vida deste bivalvo é moito máis complexo do que parece: desde que se recolle a cría ata que chega ás nosas mesas e, finalmente, o mellor de todo: poderás degustalo acompañado dun bo viño.

Día 2. Tarde

A primeira hora da tarde recomendamos a visita á zona arqueolóxica dos Castros de Neixón, declarados Ben de Interese Cultural (BIC) no ano 2011 e ao Centro Arqueolóxico  do Barbanza, que alberga e custodia no seu interior unha parte importante dos restos recuperados nas escavacións arqueolóxicas. O Centro Arqueolóxico foi a primeira colección visitable de natureza arqueolóxica e ámbito local que se creou en Galicia. Nel, a través de maquetas, paneis e reproducións explícase o contexto dos restos arqueolóxicos máis representativos de toda a comarca do Barbanza: desde o Neolítico ata a Idade de Ferro: túmulos e mámoas, arte rupestre e castros.

No centro de interpretación, que está adaptado para persoas con discapacidade visual e que dispón dunha sala inferior practicable para persoas con mobilidade reducida, permanece aberto de xoves a domingo, mañá e tarde.

Xa de volta da zona centro, despois do obrigado shopping, suxerímoste que te achegues ao Paseo Fluvial do Río Breiro, unha nova senda peonil, de case 1 km de lonxitude, que une o casco urbano có paseo marítimo de Barraña e na que poderás gozar dun ambiente tranquilo, rodeado de numerosa vexetación, así como dun peculiar lago. Ao longo do seu percorrido atoparás tamén unha variedade de máis de 200 árbores de ribeira, ata seis tipos de plantas -algunhas acuáticas- e unha gran pradería de herbáceos. Conta cunha área recreativa dotada de mesas e bancos en zona de sombra, nos que poder deterte  para retomar forzas.

Día 2. Cea

O tapeo na nosa localidade é moito máis que tradición, forma parte da nosa cultura. Basta con que percorras a rúa peonil en horas punta para que poidas comprobalo. Bares e terrazas son lugar de encontro nos que charlar cós amigos gozando dun bo viño. Aínda que a rúa peonil é a principal zona de tapeo e comida, hai outros moitos bares e restaurantes dispersos no rueiro de Boiro.

O mexillón, a ameixa, o berberecho, o polbo, a pescada e o sargo da ría fan de cada degustación unha experiencia única.

Día 2. Noite

Boiro ofrece unha sorprendente programación cultural: música, teatro, concertos de pequeno formato, maxia, contacontos, etc. Son os habituais dunha rica Axenda cultural da que poderás gozar todo o año.